Shintigrafia e tiroides është ekzaminim i mjekësisë bërthamore, i thjeshtë dhe i padhimbshëm, që lejon të studiohen forma, dimensioni dhe funksioni i tiroides.

Informacioni  që jep shintigrafia e tiroides mbi funksionalitetin dhe strukturën e tiroides, ndihmon në marrjen e një diagnoze të shpejtë, hallkë mjaft e rëndësishme për të vijuar më tej me proçedura të mëtejshme diagnostike dhe trajtimin e duhur të pacientit.

Proçedura:

Proçedura zgjat rreth 30 minuta dhe siç theksuam edhe më lart nuk është e dhimbshme.

Fillimisht injektohet një substancë e veçantë e quajtur “radiomedikament” (apo gjurmues radioaktiv) në mënyrë që të përthithët nga gjendra tiroide e cila çliron “rrezatimin”. Aparatura e përdorur për proçedurën quhet “gamma camera”dhe shërben për transformimin në imazh të rrezatimeve të çliruara nga gjendra tiroide.

Imazhi shintigrafik i tiroides normale riprodhon ekzatësisht aspektin anatomik të saj, duke evidentuar të dy lobet, nga të cilët lobi i djathtë është zakonisht në dimensione pak më të mëdha se i majti dhe zona e istmusit, e vendosur përpara trakesë e cila shfaqet në formën e një zone me pak radioaktivitet.

Gjurmuesi universal i përdorur për shintigrafinë e tiroides është ^99mTcO4_– dhe merret  në rrugë intrevenoze në sasi 1 – 2 mCi (35 – 70Mbq).

Në rastet e ektopisë së indit të tiroides(pozicionimi i gjendrës së tiroides pas dërrasës së kraharorit pra, pozicionim jo normal) dhe në rastet e prezencës së metastazave të dyshimta funksionante të kancerit të tiroides, rekomandohet si gjurmues jodi (¹³¹J) i cili çliron energji relativisht të lartë të rrezatimit, e për pasojë siguron kushte të besueshme të zbulimit nga jashtë.

Në cilat raste rekomandohet të kryhet Shintigrafia e Tiroides?

Shintigrafia e tiroides rekomandohet në këto raste klinike për:

1- Përcaktimin e vendodhjes (tiroide linguale që konsiderohet si variant fiziologjik, ektopitë e tiroides – mediastinale) si dhe formës (hipoplazi – tiroide e vogël, hemigenezi – mungesa e një lobi)

2- Studimin funksional të nodujve(gjendrave) të tiroides që mund të shfaqen në formën e:

• Nodujve “të nxehtë“(zona hiperaktive) kur janë të përbërë nga inde me shkallë të lartë aktiviteti.
• Nodujve “të ngrohtë“ që paraqesin aktivitet lehtësisht më të shtuar se ai i parenkimës përreth.
• Nodujve “të ftohtë“(zona hipoaktive) të formuar nga inde me aktivitet të ulët deri dhe mungesë të aktivitetit të tiroides.

Të dhënat që merren nga ekzaminimi shintigrafik i tiroides kanë shumë rëndësi në vendosjen e  diagnozës dhe ndjekjen e mëtejshme të pacientit.

3- Evidentimin e Tiroiditis – inflamacionit të tiroides

4- Zbulimin e indit residual pas heqjes radikale të tiroides

Efektet anësore të shintigrafisë:

Shintigrafia e tiroides nuk duhet të kryhet te gratë shtatzëna.

Ndërkohë, mund të themi që shintigrafia si ekzaminim nuk paraqet efekte anësore të pa dëshiruara pasi sasia e rrezatimit të përdorur është mjaft e ulët e për pasojë nuk sjell komplikacione mjekësore për shëndetin e pacientit.

Në përfundim të ekzaminimit pacienti mund t’i rikthehet aktivitetit të tij/saj ditor normal.

Pas përfundimit të ekzaminimit rekomandohet të konsumohet sa më shumë ujë, kjo për të eleminuar gjurmuesin e pranishëm në organizëm.

Gjatë 24 orëve në vijim, pas kryerjes së ekzaminimit duhet të qëndroni në një distancë të paktën 1(një) metër larg nga fëmijët e vegjël dhe gratë shtatzëna.

Dr.Vladimir Titka

Spitali Hygeia Tiranë

Tel: +355 4 23 90 000