Klinika Pediatrike Hygeia është një klinikë gjithëpërfshirëse dhe nga më bashkëkohoret në Rajon. Përpos ambjenteve komode dhe të standartave ndërkombëtare si dhe teknologjisë së avancuar që kjo Klinikë disponon, stafi I mjekëve specialist pediatër, ofron për pacientët e vegjël, , shërbim 24 orë në ditë në 365 ditë të vitit.

Klinika pediatrike Hygeia ofron mjekë pediatër me kohë të plotë në çdo ditë të vitit duke mbuluar të gjithë gamën e shërbimeve dhe trajtimeve mjekësore në ndihmë të pacientëve të moshave pediatrike, qofshin këta ambulatorë dhe të hospitalizuar.

Në dispozicion të kësaj Klinike janë edhe 8 dhoma shtrimi super komode dhe moderne, ku ofrohet shërbim infermieror i specializuar 24 orë në ditë, duke asistuar me profesionalizëm dhe përkushtim të gjithë rastet që kanë nevojë për hospitalizim (shtrim në spital), nga ato rutinë (ditore) deri te ato më të komplikuarat.

Përveç dhomave të vizitave dhe atyre të shtrimit, Klinika është e pajisur edhe me një kënd lojrash për fëmijët, kjo me qëllimin e vetëm që fëmijëve t’ju krijohet një ambient sa më miqësor dhe të kenë mundësi të kalojnë kohën dhe të harrojnë që ndodhen brenda ambienteve spitalore.

Për të qenë më pranë nevojave të pacientëve tanë Spitali ofron edhe karta Pediatrike të personalizuara të cilat ofrojnë benefite të shumta si nga ana mjekësore ashtu edhe financiare, si për rastet e pacientëve ambulatorikë ashtu edhe të hospitalizuar. Kartat kanë afat vlefshmërie 1-vjeçar.

Vizioni ynë:

Ofrimi I shërbimeve pediatrike të cilësisë së lartë si dhe trajtim të plotë për fëmijët e hospitalizuar, duke kombinuar eksperiencën e stafit të kualifikuar mjekësor dhe atij ndihmës (infermier & sekretare). Synim kryesor kemi të ofrojmë shërbimeve mjekësore dhe trajtimeve bashkëkohore të krijojmë edhe një ambient sa më miqësor dhe familjar për pacientët e vegjël dhe familjarët e tyre, me besin të plotë se vetëm familjarët dhe mjeku pediatër e di se cfarë është më e mira për fëmijën, ne veprojmë si një skuadër e vetme për të ofruar më të mirën e mundshme dhe zgjidhjen optimale të çdo problematike mjekësore.

Stafi mjekësor dhe infermieror i Klinikës Pediatrike Hygeia është I përkushtuar të ofrojë një përkujdesje të veçantë për fëmijët pacientë dhe familjarët e tyre, me qëllim përmbushjen e të gjitha nevojave dhe kërkesave të paciëentëve të vegjël.

Pjesë e stafit mjekësor të kësaj Klinike janë mjekë pediatër të specialiteteve të ndryshme si:

• Mjek pediatër kirurg
• Mjek pediatër infeksionist
• Mjek pediatër i anestezist
• Mjek pediatër kardiolog
• Mjek pediatër i përgjithshëm

Duke formuar kështu një ekip të mirëformnuar mjekësor dhe mbi të gjitha me shumë eksperiencë, të aftë të ofrojnë shërbime shëndetësore gjithëpërfshirëse për fëmijët dhe për ti dhënë zgjidhje optimale cdo patologjie mjekësore. Stafi infermieror i kësaj Klinike përbëhet nga infermierë të specializuar kryesisht për të asistuar nga pikëpamja mjekësore fëmijët dhe nevojat e tyre specifike. Spitali Hygeia Tiranë është I vetmi Spital privat në vend që ofron shërbimin e kirurgjisë pediatrike duke mbuluar të gjithë gamën e patologjive kirurgjikalë të moshës pediatrike. Ky shërbim në Spitalin Hygeia realizohet në mënyrë të suksesshme nga një staf mjekësh kirurgë dhe anestezistë pediatër të kualifikuar dhe me shumë eksperiencë në këtë fushë.

Po kështu një tjetër shërbim unik që ofrohet në Spitalin Hygeia Tiranë është edhe Imazheria Pediatrike e cila është e pajisur me teknologji të avancuar mjekësore dhe mjekë pediatër imazhersitë të kualifikuar në Universitetet më në zë në botë dhe me shumë eksperiencë ofrojnë diagnostikimin imazherik të pacientëve pediatrikë, si për ata ambulatorikë edhe ata të hospitalizuar, duke filluar nga të porsalindurit, foshnjet dhe fëmijët të të gjitha moshave deri në 16 vjeç.

Stafi i mjekëve kirurgë ORL mbulon të gjithë gamën e ndërhyrjeve kirurgjikale otorinolaringologjike ose kirurgjive të veshit të tilla si:

• Timpanoplastikat e të gjithë llojeve,
• Trajtim të kolosteatomave dhe të gjithë komplikacioneve të tyre,
• Malformacione të ndryshme kongjenitale (atrezi të kanalit të jashtëm të dëgjimit, kolosteatoma kongjenitale etj),
• Riparim kirurgjikal të otosclerosis.

Një tjetër sektor në të cilin është i specializuar ekipi i mjekëve të këtij Departamenti është edhe kirurgjia e bazës kraniale (neurinomë akustike, paraganglioma, neuromë e apeksit, kolesteatoma petroze).

Ndërhyrje Otoneurokirurgjikale

Stafi i mjekëve kirurgë të këtij Departamenti realizon në mënyrë profesionale të gjithë gamën e kirurgjisë funksionale të hundës & sinuseve. Sallat kirurgjikale janë të pajisura me të gjithë aparaturat dhe pajisjet e nevojshme për realizimin e FESS të të gjithë llojeve, duke trajtuar që nga problemet anatomike, post-traumatike, polipozat, inflamacionet akute apo kronike të thjeshta apo të nderlikuara. Ekipi realizon trajtim endoskopik të tumoreve ( neoplazive beninje apo malinje të hundës apo sinuseve). Po kështu realizohet në mënyrë të suksesshme trajtimi endosokopik i gjakëderdhjes nga hunda, rrjedhjes së lëngut cerebrosputal ( post traumatik, post kirurgjikal apo idiopatik) si dhe problemet e kanalit të lotit. Në bashkëpunim edhe me ekipet përkatëse, pra të specialiteteve të tjera, realizohen kirurgji të orbitës, kirurgji të dekompresionit të nervit optik apo trajtim endoskopik i adenomave të hipofizës apo masave të bazës kraniale që përfshihen në ato që quhen Rhino Neurokirurgji.

Në rastet e pamundësisë së trajtimit të patologjive specifike me rrugë endoskopike, realizohet kirurgjia e hapur e hundës, siç janë rastet e masave në sinuset frontale, etmoidale, sfenoidale, maksilare, osteoplastika e sinuseve frontale, maksilektomi. Midfacial Degloving sigurisht kjo kirurgji e hapur e hundës i rezervohet rasteve shumë specifike.

Metoda me rreze Laser ( CO2 Laser ) gjen një aplikim më të madh në zonën e kokës dhe qafës. Vlen per tu specifikuar fakti i aplikimit të tyre në masat tumorale beninje dhe malinje të laringut dhe hipofaringut. Në ditët e sotme me ndihmën laserit jemi në gjendje të heqim masa tumorale për të cilat më parë duhet të sakrifikohej laringu, duke e kufizuar ndërhyrjen totale të laringektomisë në raste shumë të rralla.

Në Departamentin tonë disponojmë edhe lazer me fibra optike (YAG Laser) (LISA Laser) me anë të të cilit janë realizuar shumë raste të kirurgjisë së laringsit (kordektomi posteriore apo laterale, laringektomi e pjessshme apo për kirurgjinë e hundës, kanalit të lotit, tonsilave, gjuhës etj.

Stafi ynë ka patur rezultate shumë të mira në drejtim të neoplazive tumorale, kokë qafë. Këto raste janë realizur vetëm ose në bashkëpunim me ekipet e kirurgëve maksilofacial plastikë kur ka qenë i nevojshëm rregullimi i problemeve estetike dhe funksionale të shkaktuara nga stadi i avancuar i sëmundjes. Po kështu egziston një bashkëpunim i ngushtë me ekipin e onkologëve, radioterapeutëve dhe kimioterapeutëve për një përqindje më të lartë suksesi në rastet e masave tumorale në kokë – qafë.

Paraliza e njëanshme, e cila nuk është e balancuar, e shoqëruar me ngjirje të zërit dheme aspirim, trajtohet me tireoplastike ndërsa paraliza bilaterale trajtohet me kordektomi të pasme duke përdorur Lazer CO2. Pacientët që i nënshtrohen kësaj lloj ndërhyrje qëndrojnë vetëm një ditë në spital pas ndërhyrjes dhe në përfundim të saj pacientit i sigurohet një frymëmarrje dhe zë i kënaqshëm.

Duhet ti referohemi edhe kirurgjisë së gjëndrave të pështymës. Vecanërisht në rastet e masave të parotides në rastet të cilat bëhet përgatitje dhe ruajtje e nervit facial me ndihmën e aparaturave të vecanta të pajisjeve intraoperative të zbulimit.

Parotidektomi sipërfaqësore

Me ndihmën e endoskopeve tepër modern dhe të hollë kemi mundësinë të studjojmë parotidet për arsye diagnostike dhe terapeutike ( heqje e gurëve te gjëndrat e pështymës).

Dr.Holta Sulaj, mjeke otorinolaringologe në Spitalin Hygeia Tiranë ju informon mbi sindromën e apnesë obstruktive të gjumit, ankesat dhe simptomat, dhe  proçedura që ofron Spitali Hygeia për diagnostikimin dhe trajtimin në mënyrë efektive të kësaj sindrome, si dhe pasojat në rast mostrajtimi.

Ҫfarë është sindromi  i apneve obstruktive të gjumit (OSA)?

Apneja e gjumit është një çrregullim i gjumit që karakterizohet nga ndërprerje të shkurtra të frymëmarrjes gjatë gjumit, që prek  meshkujt dhe femrat e të gjitha moshave. Fjala “apnea ” rrjedh nga greqishtja dhe do të thotë “ndërprerje e frymëmarrjes”. Ekzistojnë dy tipe të apneve: më e shpeshta është sindromi i apneve obstruktive të gjumit dhe më pak i shpeshtë është sindromi i apneve centrale të gjumit.

Apnetë obstruktive të gjumit

Apnetë obstruktive të gjumit ndodhin kur rrugët e sipërme të frymëmarrjes  bllokohen gjatë gjumit.  Zakonisht bllokimi ndodh kur indet e buta të pjesës së pasme të fytit zvogëlojnë, pakësojnë kalimin e ajrit (hipopne), ose lëshohen dhe bllokojnë plotësisht kalimin e ajrit gjatë gjumit (apne). Trupi e ndien që frymëmarrja është ndalur dhe si rrjedhojë pacienti zgjohet për të rinisur frymëmarrjen. Ky cikël përsëritet shpesh gjatë natës (ndonjëherë dhe 50-100 herë në orë) duke ndërprerë në mënyrë të përsëritur gjumin. Në zgjim pacienti është i përgjumur dhe i lodhur.

Gërhitja

Gjatë gërhitjes, muskujt e gjuhës dhe të qiellzës së butë lëshohen, gjë që çon në ngushtim të rrugëve të frymëmarrjes dhe vështirësi në frymëmarrje

Gjumë normal

Gjatë gjumit normal, rrugët e sipërme ajrore janë të lira , muskujt e gjuhës dhe qiellzës së butë e ruajnë tonusin e tyre

Apnea

Nëse muskujt lëshohen plotësisht, rrugët e ajrit bllokohen  dhe frymëmarrja ndalon

Apnetë centrale

Apneja centrale e gjumit është një sindrom shumë më i rrallë se apneja obstruktive. Ajo ndodh kur truri dështon në dërgimin e sinjalit muskujve respiratore për të nxitur frymëmarrjen. Ndryshe nga apnetë obstruktive, ku kemi një bllokim në rrugët e ajrit, këtu është truri që shkakton apnetë centrale të gjumit. Kjo ndonjëhere lidhet me dëmtime neurologjike si aksidentet cerebro-vaskulare (AVC) apo një insuficencë kardiake.

Cilët janë personat e rrezikuar?

Pacientët që vuajnë situatat e mëposhtme mund të jenë të rrezikuar për të bërë apne të gjumit:

• personat mbipeshë
• personat që gërhasin në mënyrë të rregullt
• personat që vuajnë nga hipertensioni arterial
• ata që vuajnë nga çrregullimet e ritmit
• ata që kanë histori familjare të sindromit të apneve të gjumit apo të gërhitjes
• ata që kanë rrugë të ngushtuara të frymëmarrjes ( gjuhë e madhe, mjekër e tërhequr, nofull e poshtme e pazhvilluar mirë, zmadhim i  tonsilave (bajameve), apo i qiellzës së butë).

Po kështu dhe pacientët që vuajnë nga diabeti, hipotiroza apo akromegalia,etj.

Cilët janë faktorët që ndikojnë në shtimin e gërhitjes apo apnetë gjatë natës?

Disa prej faktorëve që mund të përmendim janë:

• fjetja në shpine
• konsumi i alkoolit në darkë
• marrja e disa medikamenteve para gjumit si: somniferët, narkotikët (sedativët, qetësuesit) apo analgjezikë të veçantë (qetësues të dhimbjes).

Sa e përhapur është kjo sëmundje?

Vlerësohet që indeksi i përhapjes së sindromit të apneve obstruktive të gjumit është midis 5-10 % të popullatës. Pjesa më e madhe e njerëzve me faktorë rrisku nuk ekzaminohen dhe si rrjedhojë edhe nuk diagnostikohen. Pjesa më e madhe e njerëzve që vuajnë nga apnetë obstruktive të gjumit nuk e dinë që gërhijnë, apo që kanë periudha zgjimi gjatë natës dhe që kanë pauza në frymëmarrje. Ata e konsiderojnë normale gjendjen e lodhur dhe përgjumjen gjatë ditës. Kjo është arsyeja që ata nuk flasin për këto simptoma dhe i mohojnë ato edhe kur i pyet. Gjithësesi vlen të theksohet fakti që sindromi i apneve obstruktive të gjumit është i identifikueshëm dhe i trajtueshëm më së miri.

Cilat janë shenjat dhe simptomat?

Në zgjim:

• Gojë e thatë
• Ndjesi lodhjeje
• Dhimbje koke në mëngjes

Gjatë ditës:

• Mungesë energjie
• Irritim dhe ndryshime të humorit
• Lodhje dhe përgjumje
• Mungesë e kënaqësisë seksuale
• Vështirësi në përqëndrim dhe humbje e kujtesës

Gjatë natës

• Ngritje të shpeshta për të urinuar
• Ndjesia e mbytjes
• Gërhitje gjatë natës dhe frymëmarrje e zhurmshme gjatë ditës (vihet re lehtësisht nga personat e tjerë)
• Gjumë i shqetësuar
• Djersë gjatë natës

Shenja fizike

• Perimetri i qafës më i madh se 43cm tek meshkujt dhe më shumë se 38 cm te femrat.
• Presioni arterial i rritur, që kërkon shumë medikamente për tu kontrolluar dhe me shifra më të larta në mëngjes krahasuar me  orët e pasdites.
• Edemë e këmbëve

Si vendoset diagnoza?

Nëse mendoni se vuani nga apnetë e gjumit, mund të flisni me mjekun ORL që mund t’ju referojë për një studim të gjumit. Apnetë obstruktive të gjumit mund të diagnostikohen lehtë falë një testi që mund të realizohet në spital.

Si matet, vlerësohet apneja?

Ka disa gradë të apneve të gjumit. Ato vlerësohen në bazë të numrit të ndërprerjeve të frymëmarrjes (apneve ) apo numrit të frymëmarrjeve sipërfaqësore (hipopneve) për orë gjumi. Kjo me konsensus është quajtur indeksi I apne-hipopneve. (IAH).

IAH nga 5 – 15 – sindrom i lehtë i apneve obstruktive të gjumit

IAH nga 15 – 30 – sindrom i moderuar i apneve obstruktive të gjumit

IAH më shumë se 30 – sindrom i rëndë i apneve obstruktive të gjumit

Për shembull nëse IAH është më i madh se 50, kjo do të thotë që ju e ndaloni frymëmarrjen më shumë se 50 herë çdo minutë,  dhe që zgjoheni për të rinisur frymëmarrjen  dhe ju zë përsëri gjumi. Në këtë mënyrë ju nuk arrini kurrë të bëni gjumin çlodhës që ju nevojitet për një aktivitet optimal gjatë ditës. Për më tepër organizmi juaj është aktiv gjatë gjithë natës , gjë që shkakton stres dhe mbilodhje për zemrën tuaj.

Si trajtohet sindromi i apneve obstruktive të gjumit?

Mënyra më e shpeshtë e trajtimit të sindromit të apneve obstruktive të gjumit realizohet nëpërmjet një aparati te CPAP  (Continuous Positive Airëay Pressure)  i quajtur ndryshe presion pozitiv i vazhdueshëm i rrugëve të ajrit. Ka gjithashtu alternativa të tjera trajtimi si aparatet e gojës dhe kirurgjia , terapia e pozicionit, pakësimi i konsumit te alkolit, duhanit si dhe medikamenteve sedative, si dhe kontrolli i mbipeshës.

Përsa i përket trajtimit kirurgjikal mund të përmendet  kirurgjia e hundës, nazofaringut, orofaringut, laringut, palatumit, avancimit të maksilës dhe mandibulës, etj.Po ashtu mund të përmenden kirurgjia bariartrike, me zvogëlim të stomakut, për personat mbipeshë, apo që e kanë të pamundur rënien në peshë me metodat e zakonshme, stimuluesi i nervit hipoglos që rregullon tonusin e gjuhës (metodë akoma në studim).

Për të gjitha këto masa duhet diskutuar me mjekun specialist, nëse funksionon më mirë një formë terapie apo tjetra, apo të kombinuara.

Cilat janë përfitimet e trajtimit të apneve obstruktive të gjumit?

• Reduktimi i përgjumjes gjatë ditës
• Cilësi më e mirë jete
• Përmirësim i rendimentit në punë
• Përmirësim i kapacitetit intelektual, përqëndrimit dhe memories
• Më pak ankth, stres dhe depresion
• Përmirësim në drejtimin e automjetit dhe pakësim i aksidenteve
• Përmirësim i presionit të gjakut
• Reduktim i niveleve të sheqerit në gjak për pacientët që vuajnë nga diabeti tip 2
• Reduktim i stresit dhe lodhjes së zemrës dhe sistemit kardio-vaskular
• Reduktim i shanseve për aksident cerebro-vaskular
• Reduktimi i rrezikut për vdekje të papritura

Cilat janë pasojat nëse apnetë obstruktive të gjumit nuk trajtohen?

–     Përgjumje gjatë ditës

• Hipertension arterial
• Sëmundje kardiake
• Aksidente cerebro-vaskulare
• Vdekje e papritur
• Aksidente me makinë (pacientët që vuajnë nga apnetë obstruktive të gjumit kanë 10 herë më shumë shanse për të bërë aksidente me makinë)
• Aksidente në punë nga mungesa e gjumit
• Cilësi jo e mirë jete
• Funksione intelektuale të reduktuara
• Diabet tip 2
• Disfunksion seksual
• Tek shtatëzënat rriet risku për komplikacione gjatë shtatëzënisë, gjatë dhe pas lindjes
• Tek fëmijët:
  • vonesë në rritje, përkeqësim të raporteve të zhvillimit të fytyrës,  çrregullime të sjelljes, probleme të përqëndrimit, duke ulur performancën në shkollë etj.

Në përfundim theksojmë faktin që apnetë obstruktive të gjumit janë një sindrom që në momentin që dyshohet se ekziston, duhet diagnostikuar sa më parë nga mjeku specialist, me qëllim evitimin e pasojavë dhe ndikimit që ka jo vetëm  në shëndetin dhe jetën sociale të pacientit, por edhe rrezikut që sjell në shoqëri, lidhur me pasojat që mund të sjellë në shtimin e numrit të aksidenteve dhe rrezikshmërinë e tyre.

Trajtimi efektiv i këtij sindromi përmirëson cilësinë e jetës së pacientit, përmirëson shëndetin fizik dhe psikologjik të tij, redukton kostot dhe rreziqet për shoqërinë, pra është me përfitim për të gjithë.

Me teper informacion rreth Apnesë:

• Sindromi i Apneve Obstruktive te  gjumit te femijet
• Pyetesor i depistimit te crregullimeve te gjumit tek femijet
• Pyetesori STOP-BANG

Qendra e Onkologjisë Hygeia merret me diagnostikimin, trajtimin dhe ndjekjen në vazhdimësi (follow up) të pacientëve me kancer. Kjo Qendër është e pajisur me aparatura dhe pajisje nga më bashkëkohoret për të ofruar shërbim sa më cilësor dhe të specializuar në diagnostikimin dhe trajtimin e të githë llojeve të kancerit. Stafi i mjekëve onkologë të kësaj Qendre është i përbërë nga mjekë onkologë radioterapeut dhe kimioterapeut shumë të njohur, grekë dhe shqiptarë, të kualifikuar në Universitete të njohura në Europë dhe më gjerë, të cilët kanë edhe një eksperiencë shumë të gjerë në fushën e trajtimit të sëmurëve me kancer, duke ofruar për secilin prej tyre plan trajtimi të personalizuar dhe cilësor. Kjo Qendër drejtohet nga mjekja e mirënjohur Dr.Evangelia Razis MD, PhD, e specializuar në Universitetet më prestigjioze në Amerikë. Dr. Razis ka qenë nismëtare në aplikimin e standardeve dhe udhëzimeve e cilësisë ndërkombëtare si dhe masave mbrojtëse në menaxhimin e rasteve me kancer. Ajo dhe Departamenti i saj në greqi kanë qenë të parët, jashtë Shteteve të Bashkuara, që janë çertifikuar nga Shoqata prestigjioze Amerikane e Onkologjisë Mjekësore të Amerikës me Ҫertifikatën e cilësisë (QOPI) për zbatimin dhe ndjekjen e standardeve cilësore për kancerin.

Mjekët onkologë të Spitalit Hygeia bashkëpunojnë ngushtë edhe me të gjithë mjekët specialistë të Departamenteve të tjerë si ata Imazheristë, Kirurgë (të përgjithshëm, gjinekolog, urolog etj), Anestezistë me qëllim për të ofruar një shërbim të integruar, sa më efikas dhe rezultativ për të sëmurët e kësaj kategorie.

Sajë eksperiencës dhe profesionalizimit të stafit mjek dhe teknik që ofrojnë shërbim, gërshetuar edhe me teknologjinë e avancuar mjekësore që Qendra e Onkologjisë Hygeia disponon bëhet e mundur të trajtohen pothuajse të gjitha llojet e kancerave si :

• Kancer i kokës

• Kokë-qafë

• Kancer gjiri

• Kancer i rrugëve biliare

• Kancer i mushkrisë

• Kancer i mëlçisë

• Kancer I pankreasit

• Kancer i veshkavë

• Kancer i zorrës së trashë

• Kancer i Kolonit

• Kancer i vezores & lloje të tjera kancer gjinekologjik

• Kanceri I Prostatës

• Melanoma

• Kancer i lëkurës

• Kancer i tiroides…etj.

Për më shumë informacion mbi këtë Departament ju ftojmë të lexoni artikujt si dhe të ndiqni videot më poshtë:

http://www.hygeia.al/al/hygeia/artikuj-mjekesor/246-implementimi-i-teknikave-te-avancuara-te-radioterapise-ne-trajtimin-e-kancerit 

https://www.youtube.com/watch?v=sJTKXbSBvaI

https://www.youtube.com/watch?v=hdcLHtyyGWM

https://www.youtube.com/watch?v=A6z5sGzF3Jg

https://www.youtube.com/watch?v=hQNj3vbU_JU

Spitali Hygeia Tiranë është i pari Spital në Shqipëri që ka ngritur Qendrën e Radioterapisë Onkologjike e cila përdor metoda dixhitale të Radioterapisë. Kjo Qendër sjell së bashku ekspertizën e shumë specialistë për të vlerësuar dhe për të trajtuar personat që vuajnë nga sëmundje kancerogjene, gjithashtu edhe për të kryer hulumtime të ndryshme. Ekipet e mjekëve specialistë organizohen për të vendosur mbi planin e trajtimit bazuar në vendndodhjen e kancerit.

Mjekët Onkologë të çertifikuar dhe me eksperiencë janë pjesë e konsultimeve të çdo stafi mjekësor që ka lidhje me sëmundje të ndryshme si:

• Gjiri

• Sistemi Qëndror Nervor  (truri , shtylla kurrizore, probleme neurologjike)

• Endokrinologji  (tiroide, paratiroide, mbiveshkore, hipofiza)

• Gastrointestinale (anus, kolon, rektum, ezofag, hepatobiliare, pankreas, stomak)

• Urogjenitale (fshikëz, veshkë, prostatë, penis, teste, ureter)

• Gjinekologjike  (qafa e mitrës, ovaret , uterusi, vagina, vulva)

• Kokë qafë  (nazofaringu, kaviteti nazal ( I hundës) dhe sinuset, kaviteti oral ( I gojës), orofaringu, hipofaringu, laringu, gjëndra e pështymës)

• Mushkëri

• Limfoma, leuçemi dhe mieloma

• Melanoma

• Forma të tjera të kancerit të lëkurës  (qeliza skuamoze, qelizat bazale, qelizat Merkel)

• Okulistikë  (tumoret e syrit)

• Kanceri Pediatrik

• Sarkoma (kockë, indi i butë, abdominal)

Ekipet janë të pavarura në varësi të sëmundjes, por të gjitha ekipet punojnë së bashku për të zhvilluar procedurat diagnostike dhe të trajtimit, si dhe udhëzimet për vlerësimin e kujdesit që duhet ti ofrohet pacientit .

Kjo Qendër ka në përbërje të saj ekipi mjekësh onkologë të mirëtrajnuar,mjekë onkologë radioterapeut, teknikë radioterapistë,  infermierë onkologjie, asistent mjek dhe fizikant mjekësor.

Ҫelësi i suksesit  është bashkëpunimi i ngushtë që ekipi  i mjekëve onkologë radioterapeut ka me ekipin  e mjekëve onkologë mjekësor, kirurgë, radiologë, patologë dhe mjekë të specialiteteve të ndryshme të cilët koordinohen më së miri duke ofruar  shërbimin më të mirë të mundshëm.

Planifikimi i trajtimit preçiz. Mjekët e Spitalit tonë aplikojnë teknikat më të fundit të imazherisë  për të planifikuar me kujdes trajtimet e rrezatimit. Mjekët specialistë përdorin Skanerin dhe Rezonancën magnetike për të krijuar një plan trajtimi që synon të godaszë vetëm tumorin (masën tumorale).

Planifikimi i kujdesshëm që bëhet përpara trajtimit i jep mundësi mjekëve të përdorin doza më të larta rrezatimi për të trajtuar tumorin, duke kursyer indet e shëndetshëm përreth nga ndonjë dëmtim i mundshëm.

SHËRBIMET E RADIOTERAPISE

Qendra e Radioterapisë Onkologjike e Spitalit Hygeia Tiranë përdor teknikat më të fundit dhe bashkëkohore të radioterapisë:

Rrezatimi Konform 3D

Një nga llojet e shumta të trajtimit me rrezatim, rrezatimi konform 3D është një teknikë që lejon mjekët të drejtojnë rrezatimin konform  formës së tumorit.

Krahasuar me radioterapinë historike me 2-D, rrezatimi konform 3-D jep më shumë saktësi rrezatimi ndaj qelizave të kancerit, duke reduktuar sasinë e rrezatimit në qelizat e shëndetshme. Kjo formë konvencionale e terapisë rrezatuese përdoret për trajtimin e tumoreve kancerogjene dhe jokancerogjenë në të gjithë trupin.

Për t’u përgatitur për rrezatimin 3-D konform, specialistët përdorin teknologji të avancuar për të gjetur  rrugën e rrezeve të shumta të rrezatimit që do të synojnë tumorin nga drejtime të ndryshme. Gjatë rrezatimit konform 3-D, jepet një  dozë e caktuar, e cila përhapet rreth indeve normale përreth për të minimizuar dozën në çdo zonë tjetër.

Terapia IMRT 

IMRT është një lloj i avancuar i terapisë me rrezatim e cila përdoret për të trajtuar tumore kancerogjene dhe jokancerogjene.

IMRT përdor teknologjinë e avancuar për të manipuluar grimcat e rrezatimit të fotoneve  dhe protoneve për tu adaptuar me formën e tumorit. .

Kjo teknnikë përdor shumë rreze të vogla fotonesh  ose protonesh me intensitete të ndryshme për të rrezatuar saktësisht një tumor. Intensiteti i rrezatimit të secilës rreze kontrollohet dhe forma e grimcave  ndryshon përgjatë çdo trajtimi.

Qëllimi i IMRT-së është që të përputhë  dozën e rrezatimit me  objektivin dhe të shmangë ose zvogëlojë  ekspozimin e indeve të shëndetshme për të kufizuar efektet anësore të trajtimit. Në këtë mënyrë bëhet e mundur trajtimi i tumoreve që janë lokalizuar afër organeve të ndryshme, me doza shumë të larta, duke dhënë një rrezatim minimal në organet përreth zonës së prekur.

IMRT aplikohet në rastet kur me teknikën  3D është e pamundur të kryhet trajtimi, kjo në rastet kur masa tumorale gjendet shumë pranë organeve të rëndësishme (si medula spinale, brain stem, sytë, veshkat). Por IMRT mund të përdoret  edhe në të gjithë  rastet  e tjera, duke dhënë një dozë shumë më të vogël në organet përreth në krahasim me teknikën 3D, duke minimizuar në këtë mënyrë efektet anësore të radioterapisë.

Tumoret të cilat duhet patjeter të trajtohen me IMRT janë tumoret të lokalizuara në:

• Sistemin Qëndror Nervor  (truri , shtylla kurrizore, probleme neurologjike)

• Kokë qafë  (nazofaringu, kaviteti nazal ( i hundës) dhe sinuset, kaviteti oral (i gojës), orofaringu, hipofaringu, laringu, gjëndra e pështymës

• Urogjenitale (prostatë)

Të gjitha lokalizimet e tjera, edhe pse mund të trajtohen me 3D, për të ulur efektet anësore është e këshillueshme aplikimi i teknikës  IMRT.

Histeroskopia kryhet zakonisht në bazë ambulatorike, duke aplikuar një anestezi të lehtë. Gjatë histeroskopisë, kirurgu vizualizon zgavrën e mitrës me një kamera të futur përmes vaginës dhe qafës së mitrës, pa prerje.

Histeroskopia është diagnostike dhe operative.

Histeroskopia diagnostike, pra që kryhet për arsye diagnostikimi patologjie të caktuar zgjat diku rreth 5-10 minuta.

Histeroskopia diagnostike përdoret në rastet e :

• Hemorragjive uterine anormale
• Menstruacione të tejzgjatura në kohë
• Hemorragji jashtë menstracioneve
• Hemorragji në menopauzë
• Aborte të pashpjegueshme ose të përsëritura
• Fertilizimi in vitro – në rastet të cilat nuk kanë rezultuar me sukses

Histeroskopia operative, pra në rastet kur trajton anomali të caktuara zgjat rreth 20-25 minuta.

Histeroskopia operative aplikohet: 

• Si fazë që paraprin fertilizimin in vitro me qëllim rritjen e shanseve të suksesit të këtij të fundit Heqjen e polipeve endometriale (të shtresës që vesh kavitetin e mitrës)
• Heqjen e miomave submukoze (nën shtresën që vesh kavitetin e mitrës) dhe atyre intrakavitare (që zhvillohen në brendësi të kavitetit)
• Korrigjimin e anomalive të lindura të mitrës si septumi uterin (mur / perde që ndan kavitetin e mitrës në mes) apo kaviteti uterin i vogël (e ashtuquajtura mitër e vogël).
• Lokalizim dhe heqje sterileti (kontraceptiv mekanik) që mund të ketë “humbur” ose të jetë keqvendosur dhe fiksuar në kavitet.
• Heqjen e aderencave të ndryshme (zona ku muret e mitrës janë të ngjitura mes tyre).

Pas proçedurës pacientja mund të ketë një gjendje e ngjashme me atë të ngërçeve të ciklit është e zakonshme. Mund të ndodhë që të keni edhe gjakderdhje, e cila mund të zgjasë disa ditë, në varësi të ndërhyrjes.

Pas operacionit, pacientët mund të hanë dhe të pijnë si normalisht dhe mund të kthehen në aktivitetet e tyre që të nesërmen. Marrëdhëniet intime duhet të shmangen për një javë, ose derisa gjakderdhja të ndalet, në mënyrë që të zvogëlohet rreziku i infeksionit. Për këtë arsye zakonisht nga mjeku përshkruhen antibiotikë.

Histeroskopia në përgjithësi konsiderohet shumë e sigurt, por si çdo procedurë ekziston një rrezik i vogël  ndërlikimesh . Këto janë:

• Perforim i mitrës, gjë e cila nuk është e zakonshme, por në raste të rralla mund të  nevojitet transfutzion gjaku ose një ndërhyrje tjetër për ta korrigjuar atë.
• Gjakderdhje të shumtë gjatë ose pas ndërhyrjes
• Infeksion të mitrës

Në përgjithësi, procedurat laparoskopike dhe histeroskopike konsiderohen procedura të sigurta, me efekte anësore të reduktuara për pacientët, në krahasim me procedurat e hapura.

Dr Andreas Bazeos, MSc, FRCOG, Kirurg Endoskopik, Drejtor i Departamentit të Obstetri- Gjinekologjisë është trajnuar në Londër, Britani të Madhe dhe ka kryer më shumë se 5000 procedura laparoskopike dhe histeroskopike, si në Angli dhe në Greqi. Ai vetë, si dhe të gjithë mjekët tanë të tjerë me përvojë, anëtarë të Ekipit Endoskopik, do të jenë shumë të lumtur të diskutojnë në hollësi cdo gjë mbi rastin tuaj.